Biz ózimizdi taý halqynyń ór minezdi urpaǵy – vaınahtar dep tanımyz. Dástúrimizge adal, beıbitshiliksúıgish jurtpyz. 1944 jyldyń qarǵys atqyr 23 aqpany kúni kóptegen cheshen men ıngýsh otbasylarynyń shańyraǵyn ortasyna túsirgen oqıǵa oryn aldy. Ol Kavkazdan bizdiń atalarymyzdy jappaı deportasııalap, súrginge ushyratqan kún edi. Bul qandy tarıh týraly kóp jazyldy, aqıqaty aıtyldy. Oǵan toqtalyp jatýdyń qajeti qazir az shyǵar. Biraq sol tusta qazaq dalasyna kelip taban tiregen bizdiń atalarymyzdyń amanatyna aınalǵan áńgimelerdi jańǵyrtyp qaıtalaýdan eshqashan jalyqqan emespiz. Atalarymyzdyń áńgimesi – keńpeıil qazaq halqynyń qıyn-qystaý shaqtaǵy jasaǵan jaqsylyǵy jaıly edi.
Jalpy, vaınahtar ǵana emes, sol tusta Qazaqstanǵa kúshtep qonys aýdarylǵan ulystardyń barlyǵy qazaq halqynyń aldynda qaryzdar dep bilemin. Ashtyq, jappaı atý men qýdalaý, odan keıingi soǵystyń aýyrtpalyǵyn qaıyspaı kótergen qazaqtardyń ortasyna kelgen bizdiń atalarymyzdy jatsynbaı, jarty bólke nanyn bólip jegen, qorjyn tamynyń bir bólmesin bosatyp berip panalatqan meırimdi ulttyń aldyńda basymyzdy ıip, qurmetpen taǵzym jasaý adamdyq boryshymyz.
Qazir biz táýelsiz Qazaqstannyń máýelli báıtereginiń saıasynda ósip-óngen, bir myqty butaqqa aınalǵan birtutas elmiz. Eńbegimiz elimizdi gúldenderýge baǵyttalyp, urpaǵymyzdy kóbeıtip, tatý tirshilik keshýdemiz. Táýba!
Memleket basshysy Nursultan Nazarbaevtyń osydan biraz burynǵy Assambleıanyń otyrysynda sóz sóılep, 1 naýryzdy qazaq halqyna Alǵys aıtý kúni etip belgilegen kezdegi jınalysqa qatysyp otyrǵan edim. Elbasynyń aýzymen aıtylǵan osy sózden keıin marqum atamnyń bala kezden aıtyp, úıretip ketken amanaty qaıta jańǵyrǵandaı boldy. «Rahmet, qazaq baýyrlarym! Senderge myń alǵys!» deımin qazir shattanyp turyp.
Qazaqta «Er týǵan jerine» degen sóz bar. О́zim Almaty oblysynyń týmasy retinde bilimim men ǵumyrymdy óńirdiń jýrnalıstıkasyn damytýǵa jumsap kelemin. Oblystyq «Ognı Alataý» gazetiniń bas redaktory retinde elimizdiń damýyna úles qosyp, jaqsylyqtyń jarshysy bolýdan aıanǵan emespin. Ataq-abyroısyz, syı-sııapatsyz da emespiz, shúkir. Osynyń barlyǵy bir kezderi úzim nanyn bólip bergen qazaq baýyrlarymnyń yqylasy dep bilemin.
El aman bolsyn, Elbasy bastaǵan Qazaqstannyń nurly kóshi bolashaq tórine ozsyn!
Atsalım IDIGOV,
Almaty oblystyq «Ognı Alataý» gazetiniń bas redaktory
